Nga të gjitha anët e botës, sytë e veshët janë drejtuar tek shkenctarët që po punojnë në zbulimin e vaksinës kundër COVID-19.
Por sipas CNN, ekziston mundësia që ajo të mos zbulohet dhe ky nuk do të ishte rasti i parë.
“Ka viruse ndaj të cilëve ne ende nuk kemi zhvilluar një vaksinë”, thotë doktor David Nabarro, profesor i shëndetit global në Imperial College London, i cili gjithashtu shërben si një i dërguar i veçantë i Organizatës Botërore të Shëndetit për pandeminë e Covid-19.
“Ne nuk mund të bëjmë supozime absolute se vaksina do të shfaqet apo se do t`i kalojë të gjitha testet e efikasitetit dhe sigurisë”, shton ai. Një numër i madh specialistësh megjithatë janë të bindur se vaksina e Covid 19 do të arrijë të zhvillohet, e këtë bindje të tyre e ushqen dhe fakti që në ndryshim nga sëmundje si HIV-i apo malarja, koronavirusi nuk pëson mutacione aq të shpejta.
Në rast se kjo ndodh, atëherë shoqëritë, në vend që ta fshijnë Covid-19, mund të mësojnë të jetojnë me të. Qytetet do të hapeshin ngadalë dhe disa liri do të kthehen nëse ndiqen rekomandimet e ekspertëve.
Testimi dhe gjurmimi fizik mund të bëheshin pjesë e jetës sonë në periudhën afatshkurtër megjithëse një udhëzim i papritur për tu izoluar mund të mbërrijë në çdo kohë. Një mundësi e tillë, sipas gjigantit mediatik amerikan, po merret parasysh me shumë seriozitet nga mjaft ekspertët sepse diçka e tillë ka ndodhur më parë.
