Kapilaret e imta në faqe dhe hundë, shtrëngimi i lëkurës apo irritimet e shpeshta më së shumti janë rezultat i kujdesit jo adekuat.
Si t’i parandalojmë të gjitha këto probleme? Ja disa këshilla të ekspertëve britanikë. Çfarë i nevojitet lëkurës suaj në rastet e mëposhtme.
E ndjeshme në çdo aspekt
Lëkura e ndjeshme reagon edhe ndaj irritimit më të vogël. Keni provuar kremën e re dhe në fytyrë po shfaqen puçrra? Mund të paraqiten edhe skuqje dhe kruarje, të gjitha janë pasoja tipike të eksperimenteve kozmetike.
Në këtë rast, ndihmon vetëm një gjë: shmangni çdo gjë që mund të irritojë lëkurën tuaj, dhe këtu përfshihen aromat, pigmentet dhe konzervansët. Edhe emulgatorët mund të dëmtojnë lëkurën e ndjeshme. Bëhuni i kujdesshëm kur zgjedhni grimin, preparateve për trajtimin dhe pastrimin e lëkurës. Ata duhet t’i përshtaten llojit të lëkurës suaj dhe të janë të testuar dermatologjikisht.
E ndjeshme ndaj irritimeve
A shtrëngohet lëkura juaj menjëherë pas pastrimit? Për këtë mund të mbajnë përgjegjësi preparatet për kujdesin e fytyrës që nuk përputhen me tipin tuaj. Në përbërës që mund të shkaktojnë irritim të lëkurës përfshihen vitamina A (retinoli) dhe C, acide frutash, acidi salicilik dhe emulgatorët.
Nëse lëkura ju kruhet shumë, mund të bëhet fjalë edhe për alergji që ndodh si rezultat i kontaktit me substanca të caktuara. Konsultohuni me mjekun tuaj.
Për pastrimin e lëkurës mos përdorni sapun apo tretje alkooli. Më shumë do të ju pëlqejnë substancat e buta aktive për larje, të ashtuquajtura ‘sindete’ (nuk e çrregullojnë shtresën acidike të lëkurës) dhe losione për pastrimin e fytyrës të caktuara për lëkurë të ndjeshme.
E prirur për skuqje
Kapilarët e imët në faqe dhe hundë janë rezultat i ndërprerjes së rrjedhjes së gjakut nëpër rrjetin e enëve të imëta të gjakut. Fillimisht shfaqet vetëm përkohësisht, por me kohë ndërprerjet mund të shpien në zgjerimin e enëve të gjakut.
Nëse në lëkurë shpesh paraqitet skuqje, do ta qetësojë uji natyral i burimit, për shembull, në formë ‘spreji’. Preparatet me vitaminë B3 dhe vitaminë C i forcojnë enët e gjakut. Shmangni ndryshimet e papritura të temperaturës, ushqimet pikante dhe ngarkesën fizike sepse e tërë kjo mund të shkaktojë skuqje në qoftë se keni enë të dobëta të gjakut.
E thatë dhe zhvishet (qërohet)
Me moshën, lëkura bëhet e thatë, kurse dimrit nuk është aspak e pazakontë nëse ajo fillon të shtrëngohet. Megjithatë, nëse ndjeni shtrëngim në lëkurën e fytyrës gjatë gjithë vitit dhe nëse lëkura juaj vazhdimisht ‘zhvishet (qërohet)’, kjo do të thotë se ajo është shumë e thatë dhe nuk prodhon yndyrë të mjaftueshme dhe lagështi.
Përbërësit që japin lagështi (glicerina, urea, acidi laktik) forcojnë mekanizmat mbrojtës të lëkurës. Shmangni ujin dhe për pastrimin e fytyrës përdorni vetëm qumësht. Fërkojeni atë me gishta dhe pastrojeni me copëz pambuku. Nëse megjithatë përdorni ujë, kujdes që të jetë i vakët, e jo i nxehtë.
Njolla në fytyrë
Gjatë verës fytyra nuk ju është nxirë njëtrajtësisht, por në të janë shfaqur njolla, veçanërisht në ballë, tëmtha, faqe. Pothuajse gjysma e grave pas të 30-ave, ankohen për këtë problem.
Përveç arsyeve hormonale (psh. pilulat kontraceptive), shkaku kryesorë është rrezatimi UV (ultra-violet). Megjithatë, edhe ‘parfumet’ mund të përmbajnë substanca që ndryshojnë nën veprimin e dritës së diellit dhe lënë gjurmë në lëkurë.
Mos u ekspozoni tepër në diell dhe mos shkoni në ‘solarium’. Substanca të tilla si kantarioni (Hypericaceae) dhe disa antibiotikë mund të rrisin ndjeshmërinë e lëkurës ndaj dritës. Si preventivë rekomandohet përdorimi i mjeteve me një shkallë të lartë të mbrojtjes UV dhe kremave që rregullojnë krijimin e pigmentit./kosovarja.ch/
