Rreziku i dëmtimit të fëmijës suaj nga mediet sociale është më i lartë në mosha të caktuara dhe është i ndryshëm për vajzat dhe djemtë, raportojnë studiuesit.
Për të kuptuar se si përdorimi i medieve sociale ndikoi në “kënaqësinë e jetës” midis 10 dhe 21-vjeçarëve, hetuesit analizuan të dhëna afatgjata për 17 mijë e 400 të rinj në Mbretërinë e Bashkuar.
Studimi i ri zbuloi periudha kyçe kur përdorimi i medieve sociale u shoqërua me kënaqësi më të ulët për jetën, llogaritur një vit më vonë.
Për vajzat, ajo periudhë ishte midis 11 dhe 13 vjeç, ndërkaq për djemtë, ishte 14 dhe 15.
Autorët e studimit thanë se dallimet gjinore sugjerojnë se ndjeshmëria ndaj medieve sociale mund të lidhet me ndryshimet zhvillimore, të tilla si ato në strukturën e trurit ose pubertetin, që ndodh më vonë te djemtë sesa te vajzat.
Sasi më të larta të përdorimit të medieve sociale në moshën 19-vjeçare parashikuan kënaqësi më të ulët për jetën një vit më vonë si për të rinjtë ashtu edhe për gratë, treguan gjetjet. Studiuesit dyshojnë se kjo mund të jetë për shkak se ndryshimet e mëdha në atë moshë – të tilla si largimi nga shtëpia ose fillimi i punës – mund t’i bëjnë njerëzit më të prekshëm.
Në moshat e tjera, lidhja midis përdorimit të mediave sociale dhe kënaqësisë nga jeta nuk ishte statistikisht e rëndësishme, sipas raportit të botuar në internet të hënën në revistën Nature Communications.
Rënia e kënaqësisë së jetës parashikonte rritje të përdorimit të medieve sociale, pavarësisht nga mosha apo gjinia.
