EBU nuk e ka në plan ta ftojë Kosovën as për Eurovisionin e vitit 2021. Unioni i Transmetuesve Europian, EBU, kanë bërë me dije se as për këtë vit ata nuk e kanë në plan të ftojnë Kosovën për të konkurruar në festivalin e këngës evropiane, Eurovision.
Në një deklaratë të shkurtër për ESCXTRA, EBU konfirmoi se s’ka ftesa speciale. “Tani për tani, nuk ka plane për të ftuar Kazakistanin ose Kosovën që të marrin pjesë në Eurovision Song Contest 2021.”
Kosova nuk do të bëjë debutimin e saj në Eurovizion, kjo pasi që transmetuesi publik i Kosovës, RTK, nuk është as anëtar i plotë i EBU, shkruan Kosovarja.ch
RTK aktualisht nuk është në gjendje të anëtarësohet në EBU pasi nuk është anëtare e Unionit Ndërkombëtar të Telekomunikimit, ku për t’u anëtarësuar shteti duhet të jetë anëtar i OKB’së.
Në qershor të vitit të kaluar, Asambleja e Përgjithshme e EBU votoi për një propozim që do të hiqte kushtin që transmetuesit të jenë anëtarë të ITU. Sidoqoftë, një shumicë nuk e mbështeti propozimin dhe shpresat e Kosovës u shuan
Në vitin 2018, EBU lëshoi një deklaratë duke thënë se ndërsa RTK nuk i plotësonte kriteret për t’u anëtarësuar në EBU, “diskutimet konstruktive do të vazhdojnë midis EBU dhe RTK në lidhje me mundësitë e ardhshme për bashkëpunim më të ngushtë.”
E ndërsa Kosova nuk ka qenë në gjendje të garojë në Eurovision, kosovarët kanë konkurruar në festival më parë, megjithëse për vendet e tjera, si Rona Nishliu për Shqipërinë në 2012 dhe Lindita Halimi për Shqipërinë në 2017. Gjon’s Tears – i cili do të përfaqësojë Zvicrën në Eurovision 2021 – ka një baba shqiptar të Kosovës.
