Pandemia COVID-19 e ka bërë pothuajshe të domosdoshme vendosjen e maskave mbrojtëse në hapësira publike. Por sipas Shoqatës së Pediatërve në Japoni, ato nuk preferohen për fëmijët nën moshën dy vjeç.
Udhëzimet për mbrojtje ndaj Coronavirusit të Japonisë inkurajojnë njerëzit që të vendosin maska, por organi mjekësor paralajmëroi prindërit që të mos i vendosin ato tek foshnjat, sepse e bën të vështirë shprehjen dhe frymëmarrjen, thuhet në një broshurë, shkruan CNN.
“Është e mundur që maskat të vështirësojnë frymëmarrjen tek foshnjat dhe të rrisin rreziqet e goditjes nga nxehtësia”, thuhet në broshurë.
Foshnjat kanë rrugë të ngushta të frymëmarrjes dhe maska mund ta vështirësojë kësisoj frymëmarrjen, duke rritur ngarkesën në mushkëri, shkruhet tutje në borshurë.
Ekziston gjithashtu një rrezik i rritur nga asfiksia, veçanërisht nëse fëmijët e vegjël vjellin pas vendosjes së maskës, thuhet në të njëjtin burim.
Foshnjat janë me rrezik relativisht të ulët nga koronavirusi dhe shoqata konkludon se maska nuk janë të nevojshme për foshnjat nën dy vjeç.
