Shëndeti dentar është shumë i rëndësishëm. Për shembull, sëmundja e mishrave të dhëmbëve është lidhur me sëmundjet e zemrës, diabetin e tipit 2 dhe ndoshta edhe me disa lloje kanceresh.
Shëndeti jo i mirë dentar mund të ndikojë gjithashtu edhe në aftësinë për të ngrënë. Ai është i lidhur me shëndetin në përgjithësi, sepse inflamacioni dhe infeksionet në gojë mund të përhapen dhe në pjesë të tjera të trupit.
Për këto arsye është e rëndësishme që të kujdesemi për dhëmbët dhe gojën. Disa mënyra se si mund ta bëjmë këtë janë:
Mbajini dhëmbët të pastër
Kjo do të thotë që duhet t’i lani me pastë dhëmbësh të fluorizuar për 2 minuta të paktën 2 herë në ditë. Shmangni pastat zbardhuese të dhëmbëve që mund të dëmtojnë zmaltin.
Zgjidhni furçën e duhur
Furçat manuale bëjnë një punë shumë të mirë, por pajisjet elektrike mund të bëjnë një punë edhe më të mirë. Këto të fundit mund të jenë më të lehta për t’u përdorur dhe nga personat në moshë.
Pastroni mes dhëmbëve
Pastroni dhe ndërmjet dhëmbëve çdo ditë, në mënyrë që të largoni çdo grimcë ushqimi që mund të ketë mbetur aty.
Bëni vizita te dentisti
Ndërkohë që shumë dentistë rekomandojnë një pastrim dhe kontroll të dhëmbëve çdo 6 muaj, shumica e njerëzve mund të jenë mirë edhe nëse e bëjnë këtë kontroll një herë në vit.
Por nëse keni sëmundje të mishit të dhëmbëve, pini duhan apo jeni me diabet, njëherë në 6 muaj është më e përshtatshme.
Kuptojeni kur është një emergjencë
Një dhimbje e vazhdueshme, therëse, që e bën të vështirë përtypjen apo kafshimin mund të jetë një shenjë infeksioni, sidomos nëse shoqërohet me enjtje faciale. Këto infeksione mund të përhapen në nofull, kokë dhe qafë, kështu që duhet të kërkoni menjëherë trajtim tek dentisti juaj.
